*വിഷ്ണുസ്തുതി*



🙏🌹💐🪷🕉️🌸🌷🌺🙏

മത്സ്യമായി വന്ന നീയൊ-
രാമയായി പിന്നെയും
ചിത്സ്വരൂപനായ നീ
മഹാവരാഹമായതും

വെട്ടിടുന്നതൂണിൽ നിന്നും
പൊട്ടി നീ നൃസിംഹമായ്
ദുഷ്ടനാം ഹിരണ്യനെ
പിളർന്ന ഭക്തവത്സലാ

ശുദ്ധനാം മഹാബലീ
തലയിൽ വച്ചു തൃക്കഴൽ
മുക്തികാട്ടി നിന്നു
മുട്ടനായ വാമനനൻ ഭവാൻ

രാമനെന്നു പേരുകേട്ടൊ-
രാത്മരൂപനായ നീ
സോമശേഖരൻ വിധി
ഗുഹൻ ഗണേശനും ഭവാൻ

സത്യമായ തത്വമേ
സമസ്ത ജീവരക്തമേ
ഭക്തമാനസസരസ്സി-
ലുള്ള നല്ല ഹംസമേ

എന്നുമെങ്ങുമേതീലും
നിറഞ്ഞിടുന്ന രൂപമേ
നിന്നെയാരറിഞ്ഞിടുന്നു
നിർമ്മലസ്വരൂപമേ

ആനയെപിടിച്ചൊരാ
മുതലയെ വിടർത്തി നീ
ദീനരക്ഷകാ വിടർത്തി-
ടേണമെന്റെ മായയെ

കല്ലവലുതന്നവനു
നല്ലതൊക്കെനൽകിയ
നല്ലവൻ ഭവാനെനിക്കു
നല്ലതൊന്നു നൽകണേ

കുന്നടുത്തുയർത്തി നീ
കുടപിടിച്ചു നിന്നപോൽ
എന്നെയുമുയർത്തി-
യൊന്നനുഗ്രഹിച്ചിടേണമേ

തേരുമായിവന്നവനു
നീരിലും തെളിഞ്ഞപോൽ
നേരിൽനിന്റെരൂപമെന്റെ
നേരെയൊന്നുകാട്ടണേ

ഇഷ്ടനായൊരർജ്ജുനന്റെ
കൃഷ്ണനായസാരഥീ
ശിഷ്ടമെന്റെ ജീവിത-
രഥത്തെയും തെളിക്കണേ

വാക്കുമെൻപ്രവൃത്തിയും
പൊരുത്തമായിരിക്കണം
ആർക്കുമെന്നിൽനിന്നു-
പദ്രവം വരാതിരിക്കണം

നിൽപ്പിലുമിരിപ്പിലും
കിടപ്പിലും നടപ്പിലും
അല്പവും മറന്നിടായ്ക
നിന്നെ നിദ്രയിങ്കലും

ബുദ്ധിമോശമായി ഞാന-
ബദ്ധമെന്തു ചെയ്കിലും
ഭക്തലോകമിത്രമേ
പൊറുത്തനുഗ്രഹിക്കണേ

പാഹി നന്ദനന്ദനാ
മുകുന്ദ ഹേ ജനാർദ്ദനാ
പാഹിമാം മനോഹരാംഗ
മാധവാ ദയാനിധേ…🙏


🙏🌹💐🪷🕉️🌸🌷🌺🙏