🪔🪔🪔🪔🪔🪔🪔🪔🪔🪔

*🚩🪷1200 – മേടം – 12🪷🚩*

*🕉️🪷🦚25-04-2025🦚🪷🕉️*

*🔔 🔔 🔔 വെള്ളി 🔔 🔔 🔔* 

*_🚩”ശങ്കരം ലോക ശങ്കരം” – ആദിശങ്കരാനുസ്മരണം_*


*ഭാരതത്തിന്റെ സനാതന ധർമ്മത്തിന് ധർമ്മച്യുതി വന്ന കാലഘട്ടത്തിൽ ധർമ്മത്തിന്റെ പുനരുദ്ധാരണത്തിന് അവതാരം ചെയ്ത ശിവ ചൈതന്യമാണ് ആദി ശങ്കരാചാര്യർ (AD 788).*

*കാലടി കൈപ്പിള്ളി ഇല്ലത്ത് ശിവ ഗുരുവിന്റെയും പിറവം മേൽപ്പാഴൂർ മനയിൽ ആര്യാംബയുടെയും നിരന്തര പ്രാർത്ഥനയിൽ തൃശൂർ വടക്കുംനാഥൻ പ്രസാദിച്ചുണ്ടായ ബാലൻ. ശിവ സാന്നിധ്യം സ്വപ്ന ദർശനങ്ങളിലൂടെ അനുഭവിച്ചറിഞ്ഞ ആര്യാംബ, മഹാദേവന്റെ തിരുനാളായ തിരുവാതിര നക്ഷത്രത്തിൽ (മേടമാസം) ജനിച്ച പുത്രന് “ശങ്കരൻ ” എന്നല്ലാതെ മറ്റെന്തു പേരിടാൻ!*

*ചെറുപ്രായത്തിൽ തന്നെ പിതാവ് നഷ്ടമായ ശങ്കരന്റെ എല്ലാമായിരുന്നു, അമ്മ ആര്യാംബ. ഗുരുകുല സമ്പ്രദായത്തിലൂടെയായിരുന്നു വിദ്യാഭ്യാസം. അസാമാന്യ ബുദ്ധിശക്തി ബാല്യത്തിലേ പ്രകടിപ്പിച്ച ശങ്കരന് തന്റെ അവതാരോദ്ദേശ്യം മനസ്സിൽ സുദൃഢമായിരുന്നു. തന്റെ വഴി സന്യാസമെന്ന് ശങ്കരൻ ബാല്യത്തിലേ ഉറപ്പിച്ചിരുന്നു. അമിതമായ പുത്രസ്നേഹം മകന്റെ സന്യാസ മോഹത്തിന് തടസ്സം നിന്നത് സ്വാഭാവികം. പെരിയാറിൽ കുളിയ്ക്കാനിറങ്ങിയ ശങ്കരനെ ഒരു മുതല പിടിക്കുകയും പരിഭ്രാന്തയായ ആര്യാംബയോട് തന്നെ സന്യാസത്തിനു വിട്ടാൽ മുതല പിടി വിടുമെന്ന് അറിയിച്ചത് ഗത്യന്തരമില്ലാതെ അമ്മയ്ക്ക് സമ്മതിക്കേണ്ടി വന്നു (മുതലക്കടവ്).*

  *ഗുരുകുല സമ്പ്രദായത്തിലെ ഒരാചാരമാണ് ഭിക്ഷ വാങ്ങി ജീവിക്കുകയെന്നത്. ഒരു ദിവസം ഒരു ദരിദ്രയും സാത്വികയുമായ വൃദ്ധ സ്ത്രീയുടെ വീട്ടിൽ ഭിക്ഷാം ദേഹിയായി ചെന്ന ശങ്കരന് തന്റെ കയ്യിലുള്ള ഒരേ ഒരു ഉണക്ക നെല്ലിക്ക ഭീക്ഷയായി നല്കിയതിൽ സന്തോഷിച്ച് ശങ്കരൻ മഹാലക്ഷ്മിയെ സ്തുതിച്ച് “കനകധാരാ സ്തോത്രം” ചൊല്ലി സ്വർണ്ണ നെല്ലിക്ക വർഷിപ്പിച്ച ഐതിഹ്യവും ഇവിടെ സ്മരണീയം.*

*അന്നത്തെ പഴന്തോട്ടം ഗ്രാമത്തിലെ പുന്നോർക്കോട് മന, സ്വർണ്ണത്ത് മനയെന്ന പേരിൽ പ്രസിദ്ധി പറ്റി ഇന്നും ശങ്കരാചാര്യ ഭക്തരെ ആകർഷിച്ച് നിലനിൽക്കുന്നു.*

*കനകധാരാ സ്തോത്രം: അംഗം ഹരേ: പുളക ഭൂഷണമാശ്രയന്തീ ഭൃംഗാംഗനേവ മുകളാഭരണം തമാലം……………..*

*അതിരുകളില്ലാത്ത സൗഭാഗ്യങ്ങൾക്ക് നമുക്കും കനകധാരാസ്തവം നിത്യവും ചൊല്ലാം.*

  *ശങ്കരൻ തന്റെ പന്ത്രണ്ടാം വയസ്സിൽ സന്യാസം സ്വീകരിച്ച് വീടു വിട്ടിറങ്ങി. പോകുമ്പോൾ അമ്മയ്ക്ക് ഒരു വാക്ക് കൊടുത്തിരുന്നു. അമ്മയുടെ മരണ സമയത്ത് ശങ്കരൻ അമ്മയുടെ അരികത്ത് ഉണ്ടാകുമെന്ന് . പര്യടനത്തിനിടയ്ക്ക് അമ്മ രോഗഗ്രസ്തയായി. ദിവ്യദൃഷ്ടിയിലൂടെ അറിഞ്ഞ ശങ്കരൻ ഉടൻ തന്നെ അമ്മയുടെ സമീപം പ്രത്യക്ഷപ്പെട്ടു. സാക്ഷാൽ ഭഗവാന്റെ സ്വരൂപം അമ്മയ്ക്ക് കാണിച്ചു കൊടുത്ത് അവരുടെ ആഗ്രഹം നിറവേറ്റി.*
*ശവസംസ്കാരച്ചടങ്ങുകൾ സ്വയം ചെയ്യുമ്പോൾ അമ്മയുടെ മഹത്വം പ്രകീർത്തിക്കുന്ന അഞ്ചു ശ്ലോകങ്ങളിലൂടെ അമ്മ സഹിച്ച കഷ്ടപ്പാടുകൾ വിവരിച്ചു. അതാണ് “മാതൃപഞ്ചകം”. ഗർഭം ധരിച്ച് എല്ലാ വേദനകളും കഷ്ടപ്പാടുകളും സഹിച്ച് പ്രസവിച്ച്, വളർത്തി വലുതാക്കിയ അമ്മയുടെ മുന്നിൽ എല്ലാം ത്യജിച്ച സന്യാസി പോലും നമ്ര ശിരസ്കനാകുന്നു. അമ്മയുടെ അനുഗ്രമാണ് നമ്മുടെ ഭാവിയുടെ അടിസ്ഥാന ശിലയെന്നു കൂടി പറഞ്ഞ് മാതൃ പഞ്ചകം അവസാനിക്കുന്നു.*

*മാതൃപഞ്ചകം: അമ്മയുടെ മഹത്വം*
*”ആസ്താം താവദീയം പ്രസൂതിസമയേ ദുർവാര ശൂലവ്യഥാ*
*നൈരൂച്യം തനുശോഷണം മലമയീ ശയ്യാ ച സാംവത്സരീ…………..*

  *ഉത്തര ഭാരതത്തിലേയ്ക്കാണ് ശങ്കരന്റെ യാത്ര ആരംഭിക്കുന്നതു്. യഥാർത്ഥ ഗുരുവിനെത്തേടിയുള്ള യാത്ര. നർമ്മദാ തീരത്തു താമസിക്കും ഗോവിന്ദ ഭഗവദ് പാദരെ കണ്ട് ശിഷ്യത്വം സ്വീകരിച്ചു. “ദശശ്ലോകി”യെന്ന ശ്ലോകങ്ങൾ സൃഷ്ടിച്ച് അദ്വൈതത്തിന്റെ പൊരുൾ ഗുരുവിനെ ബോധ്യപ്പെടുത്തി.*

*ദശശ്ലോകി: ന ഭൂമിർ ന തോയം ന തേജോ ന വായു*
*നഖം നേന്ദ്രിയം വാന തേഷാം സമൂഹ:……”*

*മനീഷ പഞ്ചകം:-* *കാശിയിലെത്തിയ ശങ്കരനെ ശിവഭഗവാൻ ചണ്ഡാള വേഷത്തിൽ വന്ന് പരീക്ഷിച്ചപ്പോൾ തന്റെ തെറ്റായ ധാരണയെ തിരുത്തി മാപ്പ് പറഞ്ഞ് മനീഷ പഞ്ചകം എന്ന ശ്ലോകങ്ങളിലൂടെ പരമേശ്വരനെ സ്തുതിച്ചതും സന്യാസ കാലഘട്ടത്തിലെ ഒരു പ്രധാന സംഭവം തന്നെയാണ്. (ജാഗ്രത് സ്വപ്ന സുഷുപ്തിഷു സ്ഫുടതരായാ സംവിധുജ്ജ്യംഭതേ യാ……)*

    *കാശിയിൽ (വാരണാസി) ഒരു വൃദ്ധബ്രാഹ്മണൻ വ്യാകരണസംബന്ധിയായ സംസ്കൃത ശ്ലോകങ്ങൾ വളരെ ബുദ്ധിമുട്ടി ചൊല്ലുന്നതുകേട്ട ശങ്കരാചാര്യർ ഉപദേശത്തോടെ പാടിയ വരികളാണ് ”ഭജ ഗോവിന്ദം” (മോഹമുദ്ഗരം). ലൗകിക ജീവിതം ത്യജിച്ചാലേ മോഹത്തിൽ നിന്ന് മുക്തി നേടൂയെന്ന് ശങ്കരാചാര്യർ സ്ഥാപിക്കുന്നു. ആ കാലഘട്ടത്തിലെ ആചാരങ്ങളെയും മതപുരോഹിതരെയും കളിയാക്കുന്നൂ ഭജ ഗോവിന്ദം ശ്ലോകങ്ങൾ.*
*’ഭജ ഗോവിന്ദം ഭജ ഗോവിന്ദം ഗോവിന്ദം ഭജ മൂഢമതേ*
*സംപ്രാപ്തേ സന്നിഹിതേ മരണേ (കാലേ)*
*നഹി നഹി രക്ഷതി ഡുകൃഞ് കരണേ.*

   *പത്മപാദർ: ഒരു ഗുരുവിനെത്തേടി കാശിയിലെത്തിയ പണ്ഡിതനായ ഒരു ബാലനെ തന്റെ ശിഷ്യനായി ശ്രീ ശങ്കരൻ സ്വീകരിച്ചു. സനന്ദന എന്ന പേരു നൽകി സന്യാസ ദീക്ഷയും നല്കി. മറ്റു ശിഷ്യരുടെ സംശയങ്ങളെ ദൂരീകരിക്കാൻ ഒരിയ്ക്കൽ ഗംഗയുടെ മറുകരയിലായിരുന്ന സനന്ദനനെ ആചാര്യർ വിളിച്ചു. ഒട്ടും ആലോചിക്കാതെ സനന്ദന വെള്ളത്തിൽ ചവിട്ടി നടക്കാൻ തുടങ്ങി. ഓരോ ചുവടിന്റെ അടിയിലും താങ്ങിക്കൊണ്ട് താമര വിടർന്നു വന്നു, ഗംഗാദേവിയുടെ കടാക്ഷം! അന്നുമുതൽ സനന്ദന “പത്മപാദർ” എന്ന പേരിൽ അറിയപ്പെടാൻ തുടങ്ങി.*

*ശങ്കരാചാര്യരുടെ ശിരസ്സ്, ഹോമിക്കാൻ വേണമെന്ന കാപാലികന്റെ ദുരാഗ്രഹത്തെയും ശ്രമത്തെയും നരസിംഹ ഭഗവാനെ ധ്യാനിച്ച് കാപാലികനെ നിഗ്രഹിച്ചത് ഗുരുഭക്തിയുടെയും നരസിംഹമൂർത്തി സ്സേവയുടെയും മകുടോദാഹരണമാണ്.*

     *ഹിമാലയത്തിലെ ബദരിയിൽ വച്ച് ശങ്കരാചാര്യർ ഭാഷ്യങ്ങൾ (വ്യാഖ്യാനം) രചിച്ച സമയം വേദവ്യാസൻ പ്രത്യക്ഷപ്പെട്ട് ശ്രീ ശങ്കരനെ അനുഗ്രഹിച്ചതും ശങ്കര ചരിത്രത്തിൽ വിശേഷമായി കാണുന്നു.*

   *മീമാംസാപണ്ഡിതനായ കുമാരിലഭട്ട തന്റെ തെറ്റിന് പ്രായശ്ചിത്തമെന്നോണം ഉമിത്തീയിൽ പ്രവേശിച്ച സമയമാണ് ശങ്കരാചാര്യർ കുമാരിലഭട്ടനെ കാണുന്നത്. കുമാരിലഭട്ടന്റെ ആവശ്യപ്രകാരം അദ്ദേഹത്തിന്റെ ശിഷ്യനായ മണ്ഡനമിശ്രനുമായി സംവാദത്തിലേർപ്പെടാൻ ശങ്കരാചാര്യർ നിയോഗിക്കപ്പെട്ടു. 18 ദിവസങ്ങൾ നീണ്ട തർക്കത്തിൽ മണ്ഡനമിശ്രന് തോൽവി ഏറ്റുവാങ്ങേണ്ടിവന്നു. തർക്കത്തിന് മധ്യസ്ഥം വഹിച്ചതു് മണ്ഡനമിശ്രന്റെ ഭാര്യ ഉഭയഭാരതിയായിരുന്നു. ഉഭയഭാരതിയുമായും തർക്കത്തിലേർപ്പെട്ട ശങ്കരാചാര്യരോട് കാമ ശാസ്ത്രത്തെപ്പറ്റി ചോദിച്ചതിന് സന്യാസിയായ ശങ്കരാചാര്യർ കൂടുതൽ സമയം ആവശ്യപ്പെട്ടു. അല്പം മുമ്പ് മരിച്ച അമരുകൻ എന്ന രാജാവിന്റെ മൃതശരീരത്തിൽ പരകായപ്രവേശം നടത്തി രാജാവിന്റെ ഭാര്യയുമായി സമയം ചെലവഴിച്ച് വേണ്ടുന്ന അറിവ് സമ്പാദിക്കുകയും ഉഭയഭാരതിയുമായ തർക്കത്തിൽ വിജയിക്കുകയും ചെയ്തു. മണ്ഡനമിശ്രൻ പിന്നീട് ആചാര്യരുടെ ശിഷ്യത്വം സ്വീകരിച്ച് സുരേശ്വരാചാര്യരെന്ന പേരിൽ സന്യാസം സ്വീകരിക്കുകയും ശാരദാ പീഠത്തിലെ മഠാധിപതിയാകുകയും ചെയ്തു.*

*സർവ്വജ്ഞപീഠം:*
*———————-*
*അദ്വൈത സിദ്ധാന്തത്തിന് യുക്തി ഭദ്രമായ പുനരാവിഷ്കാരം നൽകി എല്ലാ വേദങ്ങൾക്കും ഭാഷ്യം രചിച്ച് ഭാരതത്തിലെ തത്ത്വചിന്തകരുമായി ചർച്ചകളിലേർപ്പെട്ട്, സംവാദം നടത്തി വിജയശ്രീലാളിതനായ ശങ്കരാചാര്യ സ്വാമികൾ സർവ്വജ്ഞപീഠത്തിലേക്ക് അടുത്തു.*

*ശങ്കരാചാര്യർ തപസ്സ് ചെയ്ത് ദേവിയെ പ്രത്യക്ഷപ്പെടുത്തിയ സ്ഥലമാണ് ശാരദാ പീഠം. (ഇപ്പോൾ പാകിസ്താൻ അധീനതയിലുള്ള കശ്മീരിലാണ് ശാരദാ പീഠം). ഇതിന് നാല് ഗോപുര വാതിലുകൾ. ദക്ഷിണ ഭാരതത്തിൽ നിന്ന് ആരും സർവ്വജ്ഞപീഠം കയറിയിട്ടില്ലാത്തതുകൊണ്ട് ആ വാതിൽ അടഞ്ഞുകിടന്നിരുന്നു. ആ ഗോപുര വാതിലാണ് ശങ്കരാചാര്യരുടെ പാണ്ഡിത്വത്തിനു മുന്നിൽ തുറക്കപ്പെട്ടത് —- സർവ്വജ്ഞ പട്ടം (പീഠം)*

  *പ്രധാന കൃതികളും സ്ഥാപിച്ച മഠങ്ങളും*  *————————–*
*സന്യാസ ശ്രേഷ്ഠനും തത്ത്വചിന്തകനും ദാർശനികനുമായിരുന്ന ശ്രീ ശങ്കരാചാര്യ സ്വാമികൾ അനേകം സംസ്കൃത ഗ്രന്ഥങ്ങളുടെ രചയിതാവാണ്. ബ്രഹ്മസൂത്രഭാഷ്യം ഉപനിഷത്തുക്കളുടെ ഭാഷ്യം, ഭഗവദ് ഗീതാഭാഷ്യം ഉപദേശസഹശ്രീ വിവേക ചൂഢാമണി ഭക്തി സ്തോത്രങ്ങൾ… ആചാര്യരുടെ കൃതികളെ ഭാഷ്യം, പ്രകരണ ഗ്രന്ഥം (തത്ത്വചിന്ത) സ്തോത്രം (ഭക്തി ഗീതങ്ങൾ) എന്നീ മൂന്നു വിഭാഗങ്ങളായി തിരിച്ച് 76 ഓളം കൃതികൾ രചിച്ചതായി കരുതുന്നു.*

*ദ്വൈതത്തെ നിഷേധിക്കുന്ന വേദാന്തമാണ് അദ്വൈതവേദാന്തം. ഉപനിഷത്ത്, ബ്രഹ്മസൂത്രം, ഭഗവദ് ഗീത ഈ പ്രസ്ഥാനത്രയിയാണ് അദ്വൈത ശ്രമത്തിലെ പ്രമാണങ്ങൾ. വേദാന്തത്തിന്റെ കാതലായ ആശയങ്ങളെ ശ്രീ ശങ്കരാചാര്യർ വിവേകചൂഡാമണിയിൽ സംഗ്രഹിച്ചിരിക്കുന്നു.*
*”ബ്രഹ്മ സത്യം ജഗന്മിഥ്യാ*
*ജീവോ ബ്രഹ്മൈവ നാപര:”*

*(ബ്രഹ്മം സത്യം, പ്രപഞ്ചം മായ. ആത്മാവും ബ്രഹ്മവും വ്യത്യാസപ്പെട്ടിരിക്കുന്നില്ല.)*

*മഠങ്ങൾ:*
*————*
*1. ആചാര്യർ, 2. മഠം, 3. മഹാവാക്യം, 4. വേദം*

*1. പത്മപാദാചാര്യർ*
*ഗോവർദ്ധന മഠം പുരി ഒഡീഷ*
*പ്രജ്ഞാനം ബ്രഹ്മ*
*ഋഗ്വേദം*

*2. സുരേശ്വരാചാര്യർ*
*ശാരദാ പീഠം, ശൃംഗേരി കർണ്ണാടക*
*അഹം ബ്രഹ്മാസ്മി*
*യജൂർവേദം*

*3. ഹസ്താമലകാചാര്യർ*
*ദ്വാരകാ പീഠം, ദ്വാരക ഗുജറാത്ത്*
*തത്ത്വമസി*
*സാമവേദം*

*4 തോടകാചാര്യർ*
*ജ്യോതിർമഠ പീഠം, ബദരിനാഥ്*
*അയമാത്മാ ബ്രഹ്മ*
*അഥർവ്വവേദം*

*(തമിഴ് നാട്ടിലെ കാഞ്ചീപുരത്ത് ശങ്കരാചാര്യർ നേരിട്ട് സ്വാപിച്ച കാഞ്ചി കാമകോടി മഠം)*

*മഹാസമാധി (AD 820 )*  *—————————-*
   *ശ്രീ ആദിശങ്കരാചാര്യ സ്വാമികൾ തന്റെ അവതാരോദ്ദേശ്യം നിർവ്വഹിച്ചതിനു ശേഷം ഉത്തരഖണ്ഡിലെ കേദാർനാഥിൽ വച്ച് സമാധിയടഞ്ഞുവെന്നാണ് വിശ്വസിക്കുന്നത്. അതല്ലാ കാഞ്ചീപുരത്താണെന്നും, തൃശൂർ വടക്കുംനാഥ ക്ഷേത്ര പരിസരത്താണെന്നും പക്ഷങ്ങളുണ്ട്. ഭാരതത്തിനും പ്രത്യേകിച്ചും കേരളത്തിനും അഭിമാനിക്കാം ശ്രീ ആദിശങ്കരന്റെ നാമധേയത്തിൽ, ദിഗ് വിജയത്തിൽ, സർവ്വജ്ഞപീഠത്തിൽ.*

*മിന്നൽ പ്രളയത്തിൽ ഒലിച്ചു പോയ കേദാർനാഥിലെ സമാധി സ്ഥലം വീണ്ടും ഉദ്ധരിച്ച് ശ്രീശങ്കരാചാര്യരുടെ പ്രതിമ സ്ഥാപിച്ച് ഭാരതത്തിന് സമർപ്പിച്ച “ഫെയ്ത്ത് ഫാണ്ടേഷന്റെയും” കേന്ദ്ര സർക്കാരിന്റെയും താല്പര്യവും ശുഷ്കാന്തിയും ശ്ലാഘനീയമാണ്, ഒപ്പം ഭാരതീയ സംസ്കാരത്തിന്റെ വിജയവും.*

   *ജയ് ശങ്കരം ലോക ശങ്കരം*

*ആദി ശങ്കരാചാര്യ സ്വാമികളുടെ പാദ സ്മരണയിൽ പ്രണാമത്തോടെ,*

*(കടപ്പാട്: എൻ. മുരളീധരൻ, പുക്കാട്ടുപടി (അഞ്ജലി, എടത്തല പി.ഒ. 683561)*
 

*🕉️ 🪷🪔🦚BGG🦚🪔🪷 🕉️*