*🙏🏻 തമിഴ് വേദങ്ങളുടെ ലോകത്തേക്ക്…..*

   
*📚 നാണു ഭക്തൻ കൂടെ കൂടെ തിരുവനന്തപുരം ഭാഗത്തേക്ക് യാത്ര പോകാറുണ്ടായിരുന്നു. പക്ഷെ ഒരു യാത്രയിലും കൂട്ടുകാർ കൂടെ ഉണ്ടായിരുന്നില്ല. ഏകാഗ്രതയും ഏകാന്തതയും ആയിരുന്നു നാണു ഭക്തന് ഏറെയും ഇഷ്ടം. തിരുവനന്തപുരം ദേശത്ത് നാണുഭക്തൻ എത്തിയിട്ടില്ലാത്ത ക്ഷേത്രങ്ങളോ , സത്രങ്ങളോ ഇല്ലെന്നുതന്നെ പറയാം. ചെമ്പഴന്തിയിലേക്ക് മടങ്ങാത്ത പല രാത്രികളിലും അന്തിയുറങ്ങിയിട്ടുള്ളത് അത്തരത്തിലുള്ള കേന്ദ്രങ്ങളിൽ ആയിരുന്നു.  കയ്യിലുള്ള ഒരു സഞ്ചിയിൽ എപ്പോഴും ഏതെങ്കിലും പുരാണഗ്രന്ഥങ്ങൾ ഉണ്ടാകും. വിശ്രമകേന്ദ്രങ്ങളിൽ വെച്ച് ചിലപ്പോൾ മറ്റുള്ളവർക്ക് കൂടി കേൾക്കാവുന്ന ശബ്ദത്തിൽ അതെടുത്ത് പാരായണം ചെയ്യുകയും ,  അതിൻ്റെ സ്വരം വിശദമാക്കുകയും ചെയ്യും. അത് ശ്രദ്ധിക്കുവാൻ ഭാഗ്യം ഉണ്ടായിട്ടുള്ള ത്രോതാക്കൾ ആരും തന്നെ ഇടയ്ക്ക് വച്ച് പിരിഞ്ഞു പോവുകയുമില്ല. അത് അത്രമാത്രം ഇമ്പമാർന്നതും , സാരവത്തായതും , ആരെയും ആകർഷിക്കത്തക്കതുമായിരുന്നു നാണു ഭക്തൻ്റെ ആ പാരായണവും പ്രഭാഷണവും…..*


*📚 ഒരിക്കൽ നാണു ഭക്തൻ്റെ  പുരാണ പ്രഭാഷണത്തിൽ അളവറ്റ ഭക്തിയിലും മതിപ്പു തോന്നിയ ഒരാൾ അടുത്ത് ചെന്ന് സ്വയം പരിചയപ്പെടുത്തുകയും ഉണ്ടായി.  തിരുവനന്തപുരത്ത് ചാലയിൽ വളരെക്കാലമായി ഒരു പുസ്തക കട നടത്തിവന്നിരുന്ന ഒരു തമിഴൻ ആയിരുന്നു അയാൾ. ഒരു മധ്യവയസ്ക്കൻ.  തമിഴും മലയാളവും കൂടി കലർത്തിയുള്ള അയാളുടെ സംഭാഷണം നാണു ഭക്തനും ഇഷ്ടമായി. അങ്ങനെ പുരാണ കാര്യങ്ങൾ പറഞ്ഞു പറഞ്ഞ് അവർ വലിയ സൗഹൃദത്തിൽ ആവുകയും ചെയ്തു. അയാൾ തൻ്റെ പുസ്തകക്കടയിലേക്ക് നാണുഭക്തനെ  മറ്റൊരു ദിവസം ആദരപൂർവ്വം ക്ഷണിച്ചു കൊണ്ടു പോയി.  ചെറിയ ഒരു കട ആയിരുന്നു അത്. എന്നാൽ അവിടെ ധാരാളം പുസ്തകങ്ങൾ ഉണ്ടായിരുന്നു.  തമിഴിലും മലയാളത്തിലും സംസ്കൃതത്തിലും ഉള്ള സദ്ഗ്രന്ഥങ്ങളുടെ ഒര അപൂർവ്വ ശേഖരം കണ്ടതോടെ നാണു ഭക്തൻ പിന്നീട് ആ കടയിലെ ഒരു സ്ഥിരം സന്ദർശകനായിത്തീർന്നു. അതോടെ കടയുടമ സ്വന്തം ചില ആവശ്യങ്ങൾക്ക് പുറത്തു പോകുന്ന അവസരത്തിൽ കടയുടെ ചുമതല നാണു ഭക്തനെ ഏല്പിക്കുവാൻ തുടങ്ങി. പുസ്തകങ്ങൾ വിൽക്കുന്നതിനേക്കാൾ ഇഷ്ടപ്പെട്ടവ വായിച്ച് മനനം  ചെയ്യുകയായിരുന്നു നാണുഭക്തൻ്റെ  ശ്രദ്ധ മുഴുവൻ.  അങ്ങനെ തമിഴ് വേദങ്ങൾ എന്നു പ്രസിദ്ധമായ തിരുവള്ളുവരുടെ “തിരുക്കുറൾ” , മാണിക്ക വാചകരുടെ “തിരുവാചകം” ,  തിരുജ്ഞാന സംബന്ധരുടെ ഒരു ഒഴുവിൽ ഒടുക്കം തുടങ്ങി തേവാരം , ചിലപ്പതികാരം , തോൽക്കാപ്പിയം , നാന്നൂൽ എന്നിവയെല്ലാം നാണു ഭക്തൻ ഹൃദിസ്ഥമാക്കി. തമിഴ് ഭാഷകളോടും സാഹിത്യത്തോടും തമിഴ് പാടലുകളോടുമുള്ള ഹൃദയ ബന്ധം  ദൃഡമാക്കുവാൻ നാണു ഭക്തന് ഈ അവസരമാണ് നിമിത്തമായിത്തീർന്നത്. ആ കടയിലുള്ള മിക്കവാറും എല്ലാ ഗ്രന്ഥങ്ങളും നാണു ഭക്തൻ അക്കാലത്ത് തൻ്റെ ഇരിപ്പിനിടയിൽ വായിച്ചു തീർത്തിരുന്നു…*


*📚 പാണ്ഡ്യ ദേശം ഭരിച്ചിരുന്ന കുബ്ജ പാണ്ഡ്യന് ഒരിക്കൽ അതികഠിനമായ ജ്വരം ബാധിക്കയുണ്ടായി. യാതൊരു ചികിത്സകൊണ്ടും അതു ഭേദമായില്ല. ഒടുവിൽ  “തിരുജ്ഞാനസംബന്ധർ”  എന്ന സിദ്ധൻ കൊട്ടാരത്തിലെത്തി ശിവഭഗവാനെ സങ്കല്പിച്ചു കൊണ്ട്നിന്ന് രാജാവിൻ്റെ ദേഹത്തു ഭസ്മം പൂശി ആ ജ്വരബാധയിൽ നിന്നും രാജാവിനെ രക്ഷിച്ചു. ഈ കഥയും ഉദര രോഗത്താൽ വളരെ കഷ്ടപ്പെട്ടിരുന്ന അപ്പർ ശിവഭഗവാനെ പാടി സ്തുതിച്ചു സ്വയം രോഗം ശമിപ്പിച്ച കഥയും ,  ശിവഭക്തനായിരുന്ന മാണിക്യവാചകർ ഭക്തിയിൽ അലിഞ്ഞ് പാടിയത് സാക്ഷാൽ നടരാജൻ തന്നെ താളിയോലയിൽ കുറിച്ചിട്ട കഥയും ,  ശിവ ഭഗവാൻ്റെ അശരീരി കേട്ട് ചേരമാൻപെരുമാൾ പാണ്ഡ്യനാട്ടിലെത്തി സുന്ദരമൂർത്തി നായനാരെ ഗുരുവായി വരിച്ച കഥയുമൊക്കെ ഈ കടയിലെ ഇരിപ്പിനിടയിലാണ് നാണു ഭക്തൻ വായിച്ചറിഞ്ഞത്. അതോടെ തമിഴ് സിദ്ധപുരുഷനോട്  എന്തെന്നില്ലാത്ത ആദരവ് നാണു ഭക്തനു ഉണ്ടായി. ആ സ്വാധീനം കൊണ്ടാകാം തിരുക്കുറളിൻ്റെ ഏതാനും ഭാഗങ്ങൾ പിൽക്കാലത്ത് മലയാളത്തിലേക്ക് അതിന്റെ മൗലിക ശോഭയോടെ തന്നെ വിവർത്തനം ചെയ്തതിന്  ഇടയാക്കിയിട്ടുള്ളത്. പിൽക്കാലത്ത് രചിക്കപ്പെട്ട  “അനുകമ്പാദശകം”  എന്ന കൃതിയിൽ ഈ സിദ്ധന്മാര് അനുകമ്പയുടെ മൂർത്തികളായിട്ടാണ് ഗുരുദേവൻ അവതരിപ്പിച്ചിട്ടുള്ളത്….*


*🙏🏻 ഓം ധർമ്മസംസ്ഥാപകായ നമഃ 🙏🏻*