കണ്ടാലും കണ്ടാലും കൊതി തീരാത്തൊരു
ഉണ്ണിയുണ്ടവിടെയാ ഗുരുവായൂരിൽ
ചേലൊത്തൊരു പുഞ്ചിരി ചെഞ്ചുണ്ടുമായ്
അഞ്ജനക്കണ്ണനായ് വാഴുന്നൊരു പൈതലായ്

തിരുമുറ്റത്തോടി തളർന്നതോ കണ്ണാ നീ
പോയതാ ഗോപി ഹൃദയത്തെ തേടിയോ
മുരളീരവം പൊഴിയു ന്നൊരു വൃന്ദാവനത്തിലാ
ഗോക്കളെ പാലിപ്പാൻ പോയതോ നീ കണ്ണാ

രാധ തൻ ഹൃത്തിലായ് നിറയുന്ന പ്രേമമായ്
അനശ്വര പ്രണയത്തിൻ യമുനാ തീരത്ത്
ഭക്തനു ആശ്രയ പൊരുളായി വാഴുന്ന
അഖിലത്തിൻ നാഥനും നീയൊരാൾ മാത്രം

മാധവനും നീ കേശവനും നീ
ഗോവിന്ദനും നീയേ എൻ ഗോപബാലാ
സീതയ്ക്കു രാമനും രുഗ്മിണി കാന്തനും
കാർവർണ്ണാ നീയൊരാൾ തന്നെയല്ലോ

ദ്വാപരയുഗത്തിലെ ശ്രീകൃഷ്ണലീലകൾ
വീണ്ടുമൊരിക്കൽ നീ ആടുമെങ്കിൽ
വന്നിടാം നിന്നെയും തേടിയവിടെയാ
പാദത്തെ ഒരു മാത്ര തഴുകീടുവാൻ

ഗുരുവായൂർ മരുവുന്ന ഉണ്ണിയെ കാണുമ്പോൾ
തീരുന്നെൻ ജന്മദുഃഖങ്ങളൊക്കെയും
വീണ്ടുമാ തിരുനട താണ്ടുവാൻ മോഹിച്ചു
കൊതിയോടെ ഞാനിതാ കാത്തിരിപ്പൂ  ….
കണ്ണാ ദർശന സൗഭാഗ്യം നൽകിടൂ നീ ….
🙏🌹🙏

*🌹ദേവീസ്തുതി🙏*

അമ്മേ നാരായണ, ദേവീ നാരായണാ,
ലക്ഷ്മീ നാരായണ,
ഭദ്രേ നാരായണ

പാരിന്നധീശ്വരീ ചോറ്റാനിക്കരയമ്മേ,
പാദാരവിന്ദത്തിലെൻ പ്രണാമം,
പാമരനെങ്കിലും പാടുന്നു ഞാനിന്നു,
പാവനരൂപേ നിൻ പുണ്യനാമം !
[ അമ്മേ നാരായണാ…. ]

പാർവ്വണമുഖിയാകും ദേവിക്കു നേദ്യമെൻ,
പഞ്ചേന്ദ്രിയങ്ങളാം പഞ്ചാമൃതം,
പാതി കുനിഞ്ഞ ശിരസ്സിലായ് അമ്മ തൻ,
പാവനമാം വര സ്നേഹാമൃതം!
[അമ്മേ നാരായണാ … ]

പാതിയടഞ്ഞ മിഴിയിൽ നിറയുന്നു,
പാപി ഞാനെങ്കിലും കണ്ണീർകണം,
പാപങ്ങൾ നീങ്ങുവാൻ എന്നകക്കാമ്പിലോ,
പകലിലുമിരവിലും നീയെത്തണം!
[അമ്മേ നാരായണാ … ]

പങ്കജതുല്യം നിൻ നേത്ര യുഗ്മം ശിവേ,
പങ്കങ്ങൾ തീർക്കും നിൻ പാദപത്മം,
പങ്കജസംഭവൻ പോലും തൊഴുതീടും,
പാലാഴിമങ്കേ നിൻ ദിവ്യരൂപം!
[അമ്മേ നാരായണാ …]

പാരാകെ മംഗളം വന്നു ചേർന്നീടുവാൻ,
പ്രാർത്ഥിച്ചിടുന്നു ഞാൻ ലോകനാഥേ,
പാരാകെ നിൻ നാമം പാടി നടക്കുവാൻ,
പ്രാർത്ഥിച്ചീടുന്നു ഞാൻ ലോകമാതേ!
[അമ്മേ നാരായണാ ]