HOMENEW15

*ശ്രീഗോവിന്ദദാമോദരസ്തോത്രം*

അഗ്രേ കുരൂണാമഥ പാണ്ഡവാനാം ദുഃശാസനേനാഹൃതവസ്ത്രകേശാ .
കൃഷ്ണാ തദാക്രോശദനന്യനാഥാ ഗോവിന്ദ ദാമോദര മാധവേതി .. 1..

ശ്രീകൃഷ്ണ വിഷ്ണോ മധുകൈടഭാരേ ഭക്താനുകമ്പിൻ ഭഗവൻ മുരാരേ .
ത്രായസ്വ മാം കേശവ ലോകനാഥ ഗോവിന്ദ ദാമോദര മാധവേതി .. 2..

വിക്രേതുകാമാ കില ഗോപകന്യാ മുരാരിപാദാർപിതചിത്തവൃത്തിഃ .
ദധ്യാദികം മോഹവശാദവോചദ് ഗോവിന്ദ ദാമോദര മാധവേതി .. 3..

ഉലൂഖലേ സംഭൃതതണ്ഡുലാംശ്ച സംഘട്ടയന്ത്യോ മുസലൈഃ പ്രമുഗ്ധാഃ .
ഗായന്തി ഗോപ്യോ ജനിതാനുരാഗാ ഗോവിന്ദ ദാമോദര മാധവേതി .. 4..

കാചിത്കരാംഭോജപുടേ നിഷണ്ണം ക്രീഡാശുകം കിംശുകരക്തതുണ്ഡം .
അധ്യാപയാമാസ സരോരുഹാക്ഷീ ഗോവിന്ദ ദാമോദര മാധവേതി .. 5..

ഗൃഹേ ഗൃഹേ ഗോപവധൂസമൂഹഃ പ്രതിക്ഷണം പിഞ്ജരസാരികാണാം .
സ്ഖലദ്ഗിരാം വാചയിതും പ്രവൃത്തോ ഗോവിന്ദ ദാമോദര മാധവേതി .. 6..

പർയ്യങ്കികാഭാജമലം കുമാരം പ്രസ്വാപയന്ത്യോഽഖിലഗോപകന്യാഃ .
ജഗുഃ പ്രബന്ധം സ്വരതാലബന്ധം ഗോവിന്ദ ദാമോദര മാധവേതി .. 7..

രാമാനുജം വീക്ഷണകേലിലോലം ഗോപീ ഗൃഹീത്വാ നവനീതഗോലം .
ആബാലകം ബാലകമാജുഹാവ ഗോവിന്ദ ദാമോദര മാധവേതി .. 8..

വിചിത്രവർണാഭരണാഭിരാമേഽഭിധേഹി വക്ത്രാംബുജരാജഹംസി .
സദാ മദീയേ രസനേഽഗ്രരംഗേ ഗോവിന്ദ ദാമോദര മാധവേതി .. 9..

അങ്കാധിരൂഢം ശിശുഗോപഗൂഢം സ്തനം ധയന്തം കമലൈകകാന്തം .
സംബോധയാമാസ മുദാ യശോദാ ഗോവിന്ദ ദാമോദര മാധവേതി .. 10

ക്രീഡന്തമന്തർവ്രജമാത്മജം സ്വം സമം വയസ്യൈഃ പശുപാലബാലൈഃ .
പ്രേമ്ണാ യശോദാ പ്രജുഹാവ കൃഷ്ണം ഗോവിന്ദ ദാമോദര മാധവേതി .. 11..

യശോദയാ ഗാഢമുലൂഖലേന ഗോകണ്ഠപാശേന നിബധ്യമാനഃ .
രുരോദ മന്ദം നവനീതഭോജീ ഗോവിന്ദ ദാമോദര മാധവേതി .. 12..

നിജാംഗണേ കങ്കണകേലിലോലം ഗോപീ ഗൃഹീത്വാ നവനീതഗോലം .
ആമർദയത്പാണിതലേന നേത്രേ ഗോവിന്ദ ദാമോദര മാധവേതി .. 13..

ഗൃഹേ ഗൃഹേ ഗോപവധൂകദംബാഃ സർവേ മിലിത്വാ സമവായയോഗേ .
പുണ്യാനി നാമാനി പഠന്തി നിത്യം ഗോവിന്ദ ദാമോദര മാധവേതി .. 14..

മന്ദാരമൂലേ വദനാഭിരാമം ബിംബാധരേ പൂരിതവേണുനാദം .
ഗോഗോപഗോപീജനമധ്യസംസ്ഥം ഗോവിന്ദ ദാമോദര മാധവേതി .. 15..

ഉത്ഥായ ഗോപ്യോഽപരരാത്രഭാഗേ സ്മൃത്വാ യശോദാസുതബാലകേലിം .
ഗായന്തി പ്രോച്ചൈർദധി മന്ഥയന്ത്യോ ഗോവിന്ദ ദാമോദര മാധവേതി .. 16..

ജഗ്ധോഽഥ ദത്തോ നവനീതപിണ്ഡോ ഗൃഹേ യശോദാ വിചികിത്സയന്തീ .
ഉവാച സത്യം വദ ഹേ മുരാരേ ഗോവിന്ദ ദാമോദര മാധവേതി .. 17..

അഭ്യർച്യ ഗേഹം യുവതിഃ പ്രവൃദ്ധപ്രേമപ്രവാഹാ ദധി നിർമമന്ഥ .
ഗായന്തി ഗോപ്യോഽഥ സഖീസമേതാ ഗോവിന്ദ ദാമോദര മാധവേതി .. 18..

ക്വചിത് പ്രഭാതേ ദധിപൂർണപാത്രേ നിക്ഷിപ്യ മന്ഥം യുവതീ മുകുന്ദം .
ആലോക്യ ഗാനം വിവിധം കരോതി ഗോവിന്ദ ദാമോദര മാധവേതി .. 19..

ക്രീഡാപരം ഭോജനമജ്ജനാർഥം ഹിതൈഷിണീ സ്ത്രീ തനുജം യശോദാ .
ആജൂഹവത് പ്രേമപരിപ്ലുതാക്ഷീ ഗോവിന്ദ ദാമോദര മാധവേതി .. 20..

സുഖം ശയാനം നിലയേ ച വിഷ്ണും ദേവർഷിമുഖ്യാ മുനയഃ പ്രപന്നാഃ .
തേനാച്യുതേ തന്മയതാം വ്രജന്തി ഗോവിന്ദ ദാമോദര മാധവേതി .. 21..

വിഹായ നിദ്രാമരുണോദയേ ച വിധായ കൃത്യാനി ച വിപ്രമുഖ്യാഃ .
വേദാവസാനേ പ്രപഠന്തി നിത്യം ഗോവിന്ദ ദാമോദര മാധവേതി .. 22..

വൃന്ദാവനേ ഗോപഗണാശ്ച ഗോപ്യോ വിലോക്യ ഗോവിന്ദവിയോഗഖിന്നാം .
രാധാം ജഗുഃ സാശ്രുവിലോചനാഭ്യാം ഗോവിന്ദ ദാമോദര മാധവേതി .. 23..

പ്രഭാതസഞ്ചാരഗതാ നു ഗാവസ്തദ്രക്ഷണാർഥം തനയം യശോദാ .
പ്രാബോധയത് പാണിതലേന മന്ദം ഗോവിന്ദ ദാമോദര മാധവേതി .. 24..

പ്രവാലശോഭാ ഇവ ദീർഘകേശാ വാതാംബുപർണാശനപൂതദേഹാഃ .
മൂലേ തരൂണാം മുനയഃ പഠന്തി ഗോവിന്ദ ദാമോദര മാധവേതി .. 25..

ഏവം ബ്രുവാണാ വിരഹാതുരാ ഭൃശം വ്രജസ്ത്രിയഃ കൃഷ്ണവിഷക്തമാനസാഃ .
വിസൃജ്യ ലജ്ജാം രുരുദുഃ സ്മ സുസ്വരം ഗോവിന്ദ ദാമോദര മാധവേതി .. 26..

ഗോപീ കദാചിന്മണിപഞ്ജരസ്ഥം ശുകം വചോ വാചയിതും പ്രവൃത്താ .
ആനന്ദകന്ദ വ്രജചന്ദ്ര കൃഷ്ണ ഗോവിന്ദ ദാമോദര മാധവേതി .. 27..

ഗോവത്സബാലൈഃ ശിശുകാകപക്ഷം ബധ്നന്തമംഭോജദലായതാക്ഷം .
ഉവാച മാതാ ചിബുകം ഗൃഹീത്വാ ഗോവിന്ദ ദാമോദര മാധവേതി .. 28..

പ്രഭാതകാലേ വരവല്ലവൗഘാ ഗോരക്ഷണാർഥം ധൃതവേത്രദണ്ഡാഃ .
ആകാരയാമാസുരനന്തമാദ്യം ഗോവിന്ദ ദാമോദര മാധവേതി .. 29..

ജലാശയേ കാലിയമർദനായ യദാ കദംബാദപതന്മുരാരിഃ .
ഗോപാംഗനാശ്ചുക്രുശുരേത്യ ഗോപാ ഗോവിന്ദ ദാമോദര മാധവേതി .. 30..

അക്രൂരമാസാദ്യ യദാ മുകുന്ദശ്ചാപോത്സവാർഥം മഥുരാം പ്രവിഷ്ടഃ .
തദാ സ പൗരൈർജയസീത്യഭാഷി ഗോവിന്ദ ദാമോദര മാധവേതി .. 31..

കംസസ്യ ദൂതേന യദൈവ നീതൗ വൃന്ദാവനാന്താദ് വസുദേവസൂനൂ . (സൂനൗ)
രുരോദ ഗോപീ ഭവനസ്യ മധ്യേ ഗോവിന്ദ ദാമോദര മാധവേതി .. 32..

സരോവരേ കാലിയനാഗബദ്ധം ശിശും യശോദാതനയം നിശമ്യ .
ചക്രുർലുഠന്ത്യഃ പഥി ഗോപബാലാ ഗോവിന്ദ ദാമോദര മാധവേതി .. 33..

അക്രൂരയാനേ യദുവംശനാഥം സംഗച്ഛമാനം മഥുരാം നിരീക്ഷ്യ .
ഊചുർവിയോഗത് കില ഗോപബാലാ ഗോവിന്ദ ദാമോദര മാധവേതി .. 34..

ചക്രന്ദ ഗോപീ നലിനീവനാന്തേ കൃഷ്ണേന ഹീനാ കുസുമേ ശയാനാ .
പ്രഫുല്ലനീലോത്പലലോചനാഭ്യാം ഗോവിന്ദ ദാമോദര മാധവേതി .. 35..

മാതാപിതൃഭ്യാം പരിവാര്യമാണാ ഗേഹം പ്രവിഷ്ടാ വിലലാപ ഗോപീ .
ആഗത്യ മാം പാലയ വിശ്വനാഥ ഗോവിന്ദ ദാമോദര മാധവേതി .. 36..

വൃന്ദാവനസ്ഥം ഹരിമാശു ബുദ്ധ്വാ ഗോപീ ഗതാ കാപി വനം നിശായാം .
തത്രാപ്യദൃഷ്ട്വാഽതിഭയാദവോചദ് ഗോവിന്ദ ദാമോദര മാധവേതി .. 37..

സുഖം ശയാനാ നിലയേ നിജേഽപി നാമാനി വിഷ്ണോഃ പ്രവദന്തി മർത്യാഃ .
തേ നിശ്ചിതം തന്മയതാം വ്രജന്തി ഗോവിന്ദ ദാമോദര മാധവേതി .. 38..

സാ നീരജാക്ഷീമവലോക്യ രാധാം രുരോദ ഗോവിന്ദവിയോഗഖിന്നാം .
സഖീ പ്രഫുല്ലോത്പലലോചനാഭ്യാം ഗോവിന്ദ ദാമോദര മാധവേതി .. 39..

ജിഹ്വേ രസജ്ഞേ മധുരപ്രിയാ ത്വം സത്യം ഹിതം ത്വാം പരമം വദാമി .
ആവർണയേഥാ മധുരാക്ഷരാണി ഗോവിന്ദ ദാമോദര മാധവേതി .. 40..

ആത്യന്തികവ്യാധിഹരം ജനാനാം ചികിത്സകം വേദവിദോ വദന്തി .
സംസാരതാപത്രയനാശബീജം ഗോവിന്ദ ദാമോദര മാധവേതി .. 41..

താതാജ്ഞയാ ഗച്ഛതി രാമചന്ദ്രേ സലക്ഷ്മണേഽരണ്യചയേ സസീതേ .
ചക്രന്ദ രാമസ്യ നിജാ ജനിത്രീ ഗോവിന്ദ ദാമോദര മാധവേതി .. 42..

ഏകാകിനീ ദണ്ഡകകാനനാന്താത് സാ നീയമാനാ ദശകന്ധരേണ .
സീതാ തദാക്രന്ദദനന്യനാഥാ ഗോവിന്ദ ദാമോദര മാധവേതി .. 43..

രാമാദ്വിയുക്താ ജനകാത്മജാ സാ വിചിന്തയന്തീ ഹൃദി രാമരൂപം .
രുരോദ സീതാ രഘുനാഥ പാഹി ഗോവിന്ദ ദാമോദര മാധവേതി .. 44..

പ്രസീദ വിഷ്ണോ രഘുവംശനാഥ സുരാസുരാണാം സുഖദുഃഖഹേതോ .
രുരോദ സീതാ തു സമുദ്രമധ്യേ ഗോവിന്ദ ദാമോദര മാധവേതി .. 45..

അന്തർജലേ ഗ്രാഹഗൃഹീതപാദോ വിസൃഷ്ടവിക്ലിഷ്ടസമസ്തബന്ധുഃ .
തദാ ഗജേന്ദ്രോ നിതരാം ജഗാദ ഗോവിന്ദ ദാമോദര മാധവേതി .. 46..

ഹംസധ്വജഃ ശംഖയുതോ ദദർശ പുത്രം കടാഹേ പ്രതപന്തമേനം .
പുണ്യാനി നാമാനി ഹരേർജപന്തം ഗോവിന്ദ ദാമോദര മാധവേതി .. 47..

ദുർവാസസോ വാക്യമുപേത്യ കൃഷ്ണാ സാ ചാബ്രവീത് കാനനവാസിനീശം .
അന്തഃ പ്രവിഷ്ടം മനസാ ജുഹാവ ഗോവിന്ദ ദാമോദര മാധവേതി .. 48..

ധ്യേയഃ സദാ യോഗിഭിരപ്രമേയഃ ചിന്താഹരശ്ചിന്തിതപാരിജാതഃ .
കസ്തൂരികാകല്പിതനീലവർണോ ഗോവിന്ദ ദാമോദര മാധവേതി .. 49..

സംസാരകൂപേ പതിതോഽത്യഗാധേ മോഹാന്ധപൂർണേ വിഷയാഭിതപ്തേ .
കരാവലംബം മമ ദേഹി വിഷ്ണോ ഗോവിന്ദ ദാമോദര മാധവേതി .. 50..

ഭജസ്വ മന്ത്രം ഭവബന്ധമുക്ത്യൈ ജിഹ്വേ രസജ്ഞേ സുലഭം മനോജ്ഞം .
ദ്വൈപായനാദ്യൈർമുനിഭിഃ പ്രജപ്തം ഗോവിന്ദ ദാമോദര മാധവേതി .. 51..

ത്വാമേവ യാചേ മമ ദേഹി ജിഹ്വേ സമാഗതേ ദണ്ഡധരേ കൃതാന്തേ .
വക്തവ്യമേവം മധുരം സുഭക്ത്യാ ഗോവിന്ദ ദാമോദര മാധവേതി .. 52..

ഗോപാല വംശീധര രൂപസിന്ധോ ലോകേശ നാരായണ ദീനബന്ധോ .
ഉച്ചസ്വരൈസ്ത്വം വദ സർവദൈവ ഗോവിന്ദ ദാമോദര മാധവേതി .. 53..

ജിഹ്വേ സദൈവം ഭജ സുന്ദരാണി നാമാനി കൃഷ്ണസ്യ മനോഹരാണി .
സമസ്തഭക്താർതിവിനാശനാനി ഗോവിന്ദ ദാമോദര മാധവേതി .. 54..

ഗോവിന്ദ ഗോവിന്ദ ഹരേ മുരാരേ ഗോവിന്ദ ഗോവിന്ദ മുകുന്ദ കൃഷ്ണ .
ഗോവിന്ദ ഗോവിന്ദ രഥാംഗപാണേ ഗോവിന്ദ ദാമോദര മാധവേതി .. 55..

സുഖാവസാനേ ത്വിദമേവ സാരം ദുഃഖാവസാനേ ത്വിദമേവ ഗേയം .
ദേഹാവസാനേ ത്വിദമേവ ജാപ്യം ഗോവിന്ദ ദാമോദര മാധവേതി .. 56..

ദുർവാരവാക്യം പരിഗൃഹ്യ കൃഷ്ണാ മൃഗീവ ഭീതാ തു കഥം കഥഞ്ചിത് .
സഭാം പ്രവിഷ്ടാ മനസാ ജുഹാവ ഗോവിന്ദ ദാമോദര മാധവേതി .. 57..

ശ്രീകൃഷ്ണ രാധാവര ഗോകുലേശ ഗോപാല ഗോവർധന നാഥ വിഷ്ണോ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 58..

ശ്രീനാഥ വിശ്വേശ്വര വിശ്വമൂർതേ ശ്രീദേവകീനന്ദന ദൈത്യശത്രോ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 59..

ഗോപീപതേ കംസരിപോ മുകുന്ദ ലക്ഷ്മീപതേ കേശവ വാസുദേവ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 60..

ഗോപീജനാഹ്ലാദകര വ്രജേശ ഗോചാരണാരണ്യകൃതപ്രവേശ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 61..

പ്രാണേശ വിശ്വംഭര കൈടഭാരേ വൈകുണ്ഠ നാരായണ ചക്രപാണേ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 62..

ഹരേ മുരാരേ മധുസൂദനാദ്യ ശ്രീരാമ സീതാവര രാവണാരേ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 63..

ശ്രീയാദവേന്ദ്രാദ്രിധരാംബുജാക്ഷ ഗോഗോപഗോപീസുഖദാനദക്ഷ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 64..

ധരാഭരോത്താരണഗോപവേഷ വിഹാരലീലാകൃതബന്ധുശേഷ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 65..

ബകീബകാഘാസുരധേനുകാരേ കേശീതൃണാവർതവിഘാതദക്ഷ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 66..

ശ്രീജാനകീജീവന രാമചന്ദ്ര നിശാചരാരേ ഭരതാഗ്രജേശ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 67..

നാരായണാനന്ത ഹരേ നൃസിംഹ പ്രഹ്ലാദബാധാഹര ഹേ കൃപാലോ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 68..

ലീലാമനുഷ്യാകൃതിരാമരൂപ പ്രതാപദാസീകൃതസർവഭൂപ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 69..

ശ്രീകൃഷ്ണ ഗോവിന്ദ ഹരേ മുരാരേ ഹേ നാഥ നാരായണ വാസുദേവ .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 70..

വക്തും സമർഥോഽപി ന വക്തി കശ്ചിദഹോ ജനാനാം വ്യസനാഭിമുഖ്യം .
ജിഹ്വേ പിബസ്വാമൃതമേതദേവ ഗോവിന്ദ ദാമോദര മാധവേതി .. 71..

ഇതി ശ്രീബില്വമംഗലാചാര്യവിരചിതം ശ്രീഗോവിന്ദദാമോദരസ്തോത്രം സമ്പൂർണം .

(ശ്ലോക 42-45 പാഠാന്തര
ഗോവിന്ദ ദാമോദര മാധവേതി
സ്ഥാനമേ
ഹേ രാമ രഘുനന്ദന രാഘവേതി)