HomeNew11

.🙏🏻🕉️ഹരേ ഗുരുവായൂരപ്പാ🕉️🙏🏻

നാരായണീയം
കഥാരൂപത്തിൽ
🌼🌼🌼🌼

ദശകം 2

ഭഗവൽ സ്വരൂപവർണ്ണനയും ഭക്തിമഹത്വവും


സൂര്യനെ അതിലംഘിക്കുന്ന ശോഭയോടുകൂടിയ കിരീടം , ഗോപിക്കുറിയാൽ മിന്നി പ്രകാശിക്കുന്ന നെറ്റിത്തടം , കാരുണ്യം കവിഞ്ഞൊഴുകുന്ന കണ്ണുകൾ , കുളിർമ്മയുള്ള പുഞ്ചിരി പ്രകാശം , മനോഹരമായ മൂക്ക് , കവിൾത്തടങ്ങളിൽ പ്രതിഫലിച്ച് തിളങ്ങുന്ന മകരകുണ്ഡലങ്ങൾ , കഴുത്തിൽ കൗസ്തുഭ രത്നത്താലും വനമാല , മുത്തുമാല , ശ്രീവത്സം എന്നിവയാലും ഭഗവാൻ പ്രശോഭിക്കുന്നു . നിന്തിരുവടിയുടെ സാക്ഷാൽ വൈകുണ്ഠ രൂപത്തെ ഞാൻ സദാ ധ്യാനിക്കുന്നു . കേയൂരം , അംഗദം , വളകൾ രത്നങ്ങൾ ഇവകളാൽ ശോഭിക്കുന്ന നാല് തൃക്കൈകളിൽ ഗദ , ശംഖ് , ചക്രം , താമരപ്പൂ എന്നിവയാൽ മനോഹരമായതും പൊന്നരഞ്ഞാൺ കൊണ്ട് അലം കൃതമായതും മഞ്ഞപ്പട്ടുടയാട ചാർത്തിയതും പരിശുദ്ധമായ താമരപ്പൂപോലെ മനോഹരമായ തൃപ്പാദങ്ങളോടുകൂടിയതും ദുഃഖത്തെ ഇല്ലാതാക്കുന്നതും വാക്കുകളെ കൊണ്ട് വിവരിക്കാൻ കഴിയാത്തതുമായ മഹിമയോടുകൂടിയ നിന്തിരുവടിയുടെ സ്വരൂപത്തെ ഞാൻ ശരണം പ്രാപിക്കുന്നു . ഏതാണോ മൂന്നുലോകത്തിലും വെച്ച് പുണ്യമായതിൽ പുണ്യവും , മോഹനമായതിൽ മോഹനവും തേജസ്സിയായതിൽ തേജസിയും മാധുര്യസത്തിനേക്കാൾ മധുരവും ഏറ്റവും സുന്ദരമായതിൽ സുന്ദരവും അത്ഭുതകങ്ങളായതിൽ അത്ഭുതവും ആയ നിന്തിരുവടിയുടെ വിഗ്രഹത്തെ , ഹേ ! സർവ്വ വ്യാപിയായ ഭഗവാനേ ലോകത്തിൽ ആർക്കാണ് കൗതുകം തോന്നാത്തത് !.

ആനന്ദമയവും അനുഭൂതികൊണ്ട് മാത്രം അറിയാവുന്നതുമായ അങ്ങയുടെ സ്വരൂപം കണ്ടിട്ട് ഐശ്വര്യ ദേവതയായ ശ്രീദേവി അങ്ങയിൽ കൂടുതൽ അനുരക്തയായിരിക്കുന്നു . അതിനാൽ സ്വന്തം ഭക്തന്മാരുടെ അടുത്തുപോലും ദേവി അധികം വസിക്കാറില്ല . സർവ്വശക്തനും നാശരഹിതനുമായ ഭഗവാനേ അതുകൊണ്ട് ഇവൾക്ക് അങ്ങയിൽ ഉളവായ അനുരാഗത്തിന്റെ കാഠിന്യത്താൽ ചപലതയാണെന്ന ഒരപവാദം വന്നുപ്പെട്ടിരിക്കുന്നു . ഈ വൈരുദ്ധ്യം കഷ്ടമല്ലേ ? അല്ലയോ ശ്രീവല്ലഭാ ! ഈ ലക്ഷ്മീ ദേവീ അങ്ങയുടെ സൗന്ദര്യത്തിൽ ഭ്രമിച്ചത് കൊണ്ടാണ് മറ്റുള്ളവരിൽ സ്ഥിരമായി നിൽക്കാത്തത് . ഇതിനുള്ള പ്രമാണം ഞാൻ പറയാം . നിന്തിരുവടിയുടെ ധ്യാനത്തിലും , അവിടുത്തെ മഹിമകൾ കീർത്തിക്കുന്നതിലും , രസം പൂണ്ട് അവിടത്തെ ഭക്തരായിരിക്കുന്നവരിൽ പ്രകിയതമനായ അങ്ങയുടെ വിവരമുണ്ടാകുമ്പോഴെല്ലാം ശ്രദ്ധിക്കുന്നവളായ വിട്ടു പിരിയാതെ കൂടെ കൂട്ടുന്നു . ഇങ്ങിനെയെല്ലാമായ സൗഭാഗ്യത്തിന്റെ ഉറവിടവും , പരബ്രന്മരസായനവും മനോഹരവുമായ നിന്തിരുവടിയുടെ സ്വരുപം ; കേൾക്കുന്നവരുടെ മനസ്സിനെ പെട്ടെന്ന് സ്വാധീനിക്കുകയും , മദിപ്പിക്കുകയും , രോമാഞ്ച മണിയിപ്പിക്കുകയും , ആനന്ദകണ്ണീരിൽ ആറാടിക്കുകയും ചെയ്യുന്നു.

ഭഗവൽ സ്വരൂപ ശ്രവണം , മനനം തുടങ്ങിയവ കൊണ്ടാണ് ഇങ്ങിനെയുള്ള മനസിന്റെ അലിവിനെ അനുഭവിച്ചതുകൊണ്ടാണ് വ്യാസൻ , നാരദൻ മുതലായ യോഗീ ശ്രേഷ്ഠന്മാർ ഭക്തിയോഗം ജ്ഞാനകൾ യോഗങ്ങളേക്കാൾ ശ്രേഷ്ഠമാണെന്ന് പാടി പുകഴ്ത്തുന്നത് . സൗന്ദര്യമാകുന്ന രസത്തോടു കൂടിയ നിന്തിരുവടിയിൽ പരമ പ്രീതികരമായ ഭക്തി സാധാരണക്കാർക്കെല്ലാം എളുപ്പത്തിൽ കൈവരുന്നു . കർമ്മയോഗമെന്ന് പറയുന്ന നിത്യനൈമിത്തികങ്ങളായ സ്വധർമ്മാനുഷ്ഠാനം കൊണ്ട് വളരെ കാലത്തിനു ശേഷമേ ഫലമുണ്ടാകൂ . എന്നാൽ ഉപനിഷത്തുകളിൽ നിന്നും കിട്ടുന്ന തത്ത്വ ജ്ഞാനമാകട്ടെ ഇന്ദ്രീയ പ്രത്യക്ഷമല്ലാത്തതുമൂലം മനുസ്സിനു പിടികിട്ടാൻ പ്രായസമേറിയതാണ് . ഹേ വിഭോ അതുകൊണ്ട് അങ്ങയെകുറിച്ചുള്ള പ്രേമാത്മകഭക്തി തന്നെയാണ് എപ്പോഴും അതിമധുരവും ശ്രേയസ്തരവുമായിട്ടുള്ളത് . ചിലർ വളരെ അധികം ബുദ്ധിമുട്ടുള്ള കർമ്മങ്ങൾ അനുഷ്ഠിച്ച് മനശുദ്ധി കൈവരിച്ചിട്ടാണ് ജ്ഞാന ഭക്തി യോഗങ്ങൾക്ക് യോഗ്യത നേടുന്നത് . മറ്റു ചിലർ യുക്തി ചിന്തകൊണ്ട് വിഷമിച്ച് ബ്രഹ്മമെന്ന അങ്ങനൂടെ നിർഗുണരൂപം ധ്യാനിച്ച് അനേകം ജന്മങ്ങൾകൊണ്ട് മോക്ഷം പ്രാപിക്കു ന്നു . ഭഗവൽ കഥ പറയുകയും , കേൾക്കുകയും മറ്റും ചെയ്യുമ്പോഴുണ്ടാകുന്ന അമൃത പ്രവാഹത്തിൽ മുഴുകുമ്പോൾ ഭക്തിവന്നു ചേരുന്നു . ഭക്തി വർദ്ധിക്കുന്നതോടെ ശുദ്ധ ബ്രഹ്മജ്ഞാനം കെെവന്ന് മുക്തി നേടുവാൻ പ്രാപ്തനാണ് .

സർവ്വ ശക്തനായ അല്ലയോ ഗുരുവായൂരപ്പാ ! അങ്ങയുടെ തൃപാദങ്ങളിലുള്ള പ്രേമാതിശയമായ രസത്താൽ മനസലിയുന്ന ഭക്തി എന്നിലുണ്ടാകുവാൻ എത്രയുംവേഗം അനുഗ്രഹിക്കേണമേ !…..🙏🏻

ഹരേ കൃഷ്ണാ…

കടപ്പാട്: ബാലൻ പുതേരി
✍🏻അജിത്ത് കഴുനാട്
©️കണ്ണനും കൂട്ടുകാരും

🙏🏻🕉️ഹരേ ഗുരുവായൂരപ്പാ🕉️🙏🏻