HomeNew11

.🙏🏻🕉️ഹരേ ഗുരുവായൂരപ്പാ🕉️🙏🏻 നാരായണീയം കഥാരൂപത്തിൽ 🌼🌼🌼🌼

പ്രഥമസ്കന്ധം

ദശകം 1

ഭഗവാൻ്റെ സ്വരൂപവും മാഹാത്മ്യവും അഖണ്ഡസച്ചിദാനന്ദം സ്വരൂപം സ്വീകരിച്ചതും , അതുല്യവും കാലദേശങ്ങൾക്ക് അതീതവും സുഖദുഃഖങ്ങളുടെ ബന്ധമില്ലാത്തതും അനേകം വേദവാക്യങ്ങളാൽ വ്യക്തമാക്കിയതും ഒറ്റ ദർശനത്താൽ തന്നെ പുരുഷാർത്ഥമായ പരബ്രഹ്മം പരമാർത്ഥമായി ഗുരുവായൂരിൽ പരിലസിക്കുന്നു . ഭക്തജനങ്ങളുടെ മഹാഭാഗ്യം അത്ഭുതകരം തന്നെ ! ദുർലഭമായ വസ്തുവാണെങ്കിലും സുലഭമായി കയ്യിൽ കിട്ടിയിട്ടും മറ്റൊന്നിനെ ആശ്രയിക്കുന്നത് അറിവില്ലായ്മയാണ് . സമസ്ത ദുരിതങ്ങളുടെയും അറുതിക്കായി ഈ നാമം സർവ്വാത്മാവായ ഗുരുവായൂരപ്പനെ ആശ്രയിച്ചിരിക്കുന്നു . രജോതമോഗുണങ്ങളോടു ചേരാതെ ശുദ്ധസത്വഗുണമായി പഞ്ചഭൂതങ്ങളോടും പതിനൊന്ന് ഇന്ദ്രിയങ്ങളോടും കൂടിയതാണ് അങ്ങയുടെ ദിവ്യമംഗളവിഗ്രഹം . ഈ വസ്തുത വേദവ്യാസ മഹർഷി പലയിടത്തും വിസ്തരിച്ച് പറഞ്ഞിട്ടുണ്ട് . ദർപ്പണത്തിൽ സൂര്യരശ്മി പ്രതിബിംബിക്കുന്നതുപോലെ ചിദാനരസമാകുന്ന ബ്രഹ്മം ഉള്ളിൽ പ്രതിബിംബരൂപത്തിൽ നിറഞ്ഞ് പ്രകാശിക്കുന്നു . ഈ പ്രകാശപൂർണ്ണമായ വിഗ്രഹത്തെ ദർശിക്കുന്നവരും സ്മരിക്കുന്നവരും കേൾക്കുന്നവരും പരമാനന്ദ ഭക്തിസാഗരത്തിൽ ആറാടുന്നു . ഇളക്കമില്ലാത്തതും നിത്യസമ്പൂർണ്ണവും പരമാനന്ദമാകുന്ന അമൃതിന്റെ രൂപത്തിൽ സ്ഥിതിചെയ്യുന്നതും തന്നിൽ ലയിച്ചിരിക്കുന്ന നിരവധി ജീവൻ മുക്തരോടുകൂടി ശോഭിക്കുന്നതുമായ ആ നിർമ്മസത്വഗുണം തിരമാലയുടെ തിളക്കത്തിന് തുല്യമാണെന്ന് ജ്ഞാനികൾ പറയുന്നു . അങ്ങിനെയുള്ള സത്വഗുണാത്മാവായ അങ്ങ് നിഷ്കളങ്കനാകുന്നു . പരിപൂർണ്ണ അവതാരമായ അങ്ങ് നിഷ്കളങ്കനാകുന്നു . സകളൻ എന്നത് അങ്ങയുടെ അംശാവതാരമാകുന്നു . ജനന മരണങ്ങളിൽ നിന്ന് മുക്തനായ ഭഗവാനെ അങ്ങ് നിഷ്ക്രിയനായിട്ടും കാരണമില്ലാതെയുണ്ടാകുന്ന അങ്ങയുടെ ദർശനത്തെ ആശ്രയിച്ച് അങ്ങയിൽ ലയിച്ച് കിടക്കുന്നതും അസ്തിത്വമില്ലാത്തതുമായ മായാശക്തി സൃഷ്ടിയുടെ തുടക്കത്തിൽ തന്നെ ഉണർന്നു പ്രവർത്തിക്കുന്നു . ഇതേപ്രകാരം അങ്ങ് മായാശക്തിയെ സ്വീകരിച്ച് മുമ്പേ പറഞ്ഞ ലീലാവിഗ്രഹത്തിൽ കുടികൊള്ളുന്നു . പുതുമേഘകൂട്ടങ്ങളെയും കായാമ്പൂ പുഷ്പകൂട്ടങ്ങളെയും അതിലംഘിക്കുന്നതും സുകൃതികളുടെ ദർശനത്തിന് പരിപൂർണ്ണ പുണ്യത്തിന്റെ അവതാരമായതും ലക്ഷ്മീദേവിയുടെ സ്വച്ഛന്ദമായ ലീലാവിലാസങ്ങളുടെ ഇരിപ്പിടമായതും സദാ സ്മരിക്കുന്നവരുടെ ഉള്ളിൽ അമൃതപ്രവാഹം വർഷിക്കുന്നതുമായ അങ്ങയുടെ സത്വ ഗുണമായ തേജസ്സിനെ ഞാൻ സദാ സ്മരിക്കുന്നു . മായകൾക്ക് അതീതമായ ഭഗവാനേ ! അങ്ങയുടെ സൃഷ്ടികർമ്മങ്ങൾ ജീവാത്മാക്കൾക്ക് സംസാര ദുഃഖമുണ്ടാക്കുന്നതാണെന്ന് ഞാൻ മുമ്പേ കരുതിയിരുന്നു . അങ്ങ് സൃഷ്ടി കർമ്മങ്ങൾ ചെയ്യുന്നില്ലെങ്കിൽ ജീവികൾ എങ്ങിനെയാണ് ജ്ഞാനവും ആനന്ദവും കൗതുകപരവുമായ അവിടുത്തെ സ്വരുപത്തെ കണ്ണുകളാലും ചെവികളാലും ആസ്വദിച്ച് പരമാനന്ദമായ അമൃത സാഗരത്തിൽ കിടന്ന് ആഹ്ലാദിക്കുക ? അല്ലയോ ശ്രീഹരി ! അങ്ങാകുന്ന കല്പവൃക്ഷം നമസ്കരിക്കുന്നവരുടെ മുമ്പിലേക്ക് സ്വയം ചെല്ലുന്നു . അപേക്ഷിച്ചില്ലെങ്കിലും അങ്ങ് അർത്ഥം , കാമം , പരമാനന്ദം എന്നിവ നൽകുന്നു . അങ്ങനെയുള്ള അങ്ങ് എല്ലാ ഭക്തന്മാർക്കും ലഭിക്കാവുന്നതും പലതരത്തിലുമുള്ള ഫലങ്ങൾ നൽകുന്നതുമായ കല്പവൃക്ഷം തന്നെയാണ് . ഈ ആവശ്യവുമായി ഇന്ദ്രന്റെ തോട്ടത്തിലെ .കല്പകവൃക്ഷത്തെ ആഗ്രഹിക്കുന്നത് കഷ്ടമാണ് . മറ്റുള്ള ദേവന്മാർ കാരുണ്യത്തോടെ പല അഭീഷ്ടങ്ങളെയും ഭക്തർക്ക് സാധിപ്പിച്ചുകൊടുക്കുന്നു . എന്നാൽ അങ്ങാകട്ടേ തന്നെ തന്നെയാണ് ഭക്തർക്ക് നൽകുന്നത് . മറ്റു ദേവന്മാർ തങ്ങളുടെ നിയന്ത്രണ ശക്തികൊണ്ട് ജനങ്ങളുടെ ഈശ്വരനായി ഭവിക്കുന്നു . എന്നാൽ അങ്ങാകട്ടെ എല്ലാവരുടെയും അന്തരാത്മാവിൽ വിഹരിക്കുന്നു . ഭാഗ്യവാന്മാർ എപ്പോഴും ആസ്വാദ്യനായിരിക്കുന്ന അങ്ങയെ വിഷയമാക്കികൊണ്ട് അത്യന്തം ആഹ്ലാദംകൊള്ളുന്നു . അങ്ങാകട്ടെ സ്വന്തം ആത്മാവിൽ രമിക്കുന്നവനാണ് . ഇങ്ങിനെയുള്ള അനേകം ഗുണങ്ങൾക്ക് ഇരിപ്പിടമായ ഗുരുവായൂരപ്പാ അങ്ങക്ക് നമസ്കാരം ! ഐശ്വര്യം , ശ്രീപരമേശ്വരൻ മുതലായ ഈശ്വരന്മാരെ നിയമിക്കുന്നത് അങ്ങാകുന്നു . സദ്തേജസ്സുകളെയും പിടിച്ചടക്കുന്നവരെ കീഴ്പ്പെടുത്തുന്നതാണ് അങ്ങയുടെ വീര്യം . ഒന്നിലും കാംക്ഷയില്ലാത്ത സിദ്ധന്മാരും സംശുദ്ധമായ യശസ്സും അങ്ങയെ പുകഴ്ത്തുന്നു . സാക്ഷാൽ ലക്ഷ്മീദേവി സദാ അങ്ങയുടെ തിരുവുടലിൽ താല്പര്യം കാട്ടിക്കൊണ്ടുവർത്തിക്കുന്നു . സർവ്വജ്ഞനായ അങ്ങേക്ക് ആസക്തിയുടെ കഥപോലും ഒന്നിലുമില്ല . അതിനാൽ അങ്ങ് ഭഗവാൻ എന്ന പേരിന് അർഹനാകുന്നു . ഈ ദശകം പഠിക്കുന്നവർക്ക് എല്ലാവിധ ഐശ്വര്യങ്ങളും ഭഗവാൻ നൽകുമാറാകട്ടെ !....🙏🏻

ഹരേ കൃഷ്ണാ…

കടപ്പാട്: ബാലൻ പുതേരി
✍🏻അജിത്ത് കഴുനാട്
©️കണ്ണനും കൂട്ടുകാരും

🙏🏻🕉️ഹരേ ഗുരുവായൂരപ്പാ🕉️🙏🏻