ശ്യാമലാദണ്ഡകം കാലിദാസവിരചിതം

HOMENEW8


.. അഥ ശ്യാമലാ ദണ്ഡകം ..

.. ധ്യാനം ..

മാണിക്യവീണാമുപലാലയന്തീം
മദാലസാം മഞ്ജുലവാഗ്വിലാസാം .
മാഹേന്ദ്രനീലദ്യുതികോമലാംഗീം
മാതംഗകന്യാം മനസാ സ്മരാമി .. 1..

ചതുർഭുജേ ചന്ദ്രകലാവതംസേ
കുചോന്നതേ കുങ്കുമരാഗശോണേ .
പുണ്ഡ്രേക്ഷുപാശാങ്കുശപുഷ്പബാണ-
ഹസ്തേ നമസ്തേ ജഗദേകമാതഃ .. 2..

.. വിനിയോഗഃ ..

മാതാ മരകതശ്യാമാ മാതംഗീ മദശാലിനീ .
കുര്യാത് കടാക്ഷം കല്യാണീ കദംബവനവാസിനീ .. 3..

.. സ്തുതി ..

ജയ മാതംഗതനയേ ജയ നീലോത്പലദ്യുതേ .
ജയ സംഗീതരസികേ ജയ ലീലാശുകപ്രിയേ .. 4..

.. ദണ്ഡകം ..

ജയ ജനനി സുധാസമുദ്രാന്തരുദ്യന്മണീദ്വീപസംരൂഢ് –
ബില്വാടവീമധ്യകല്പദ്രുമാകല്പകാദംബകാന്താരവാസപ്രിയേ
കൃത്തിവാസപ്രിയേ സർവലോകപ്രിയേ

സാദരാരബ്ധസംഗീതസംഭാവനാസംഭ്രമാലോല-
നീപസ്രഗാബദ്ധചൂലീസനാഥത്രികേ സാനുമത്പുത്രികേ

ശേഖരീഭൂതശീതാംശുരേഖാമയൂഖാവലീബദ്ധ-
സുസ്നിഗ്ധനീലാലകശ്രേണിശൃംഗാരിതേ ലോകസംഭാവിതേ
കാമലീലാധനുസ്സന്നിഭഭ്രൂലതാപുഷ്പസന്ദോഹസന്ദേഹകൃല്ലോചനേ
വാക്സുധാസേചനേ ചാരുഗോരോചനാപങ്കകേലീലലാമാഭിരാമേ സുരാമേ രമേ

പ്രോല്ലസദ്ധ്വാലികാമൗക്തികശ്രേണികാചന്ദ്രികാമണ്ഡലോദ്ഭാസി
ലാവണ്യഗണ്ഡസ്ഥലന്യസ്തകസ്തൂരികാപത്രരേഖാസമുദ്ഭൂതസൗരഭ്യ-
സംഭ്രാന്തഭൃംഗാംഗനാഗീതസാന്ദ്രീഭവന്മന്ദ്രതന്ത്രീസ്വരേ
സുസ്വരേ ഭാസ്വരേ

വല്ലകീവാദനപ്രക്രിയാലോലതാലീദലാബദ്ധ-
താടങ്കഭൂഷാവിശേഷാന്വിതേ സിദ്ധസമ്മാനിതേ

ദിവ്യഹാലാമദോദ്വേലഹേലാലസച്ചക്ഷുരാന്ദോലനശ്രീസമാക്ഷിപ്തകർണൈക-
നീലോത്പലേ ശ്യാമലേ പൂരിതാശേഷലോകാഭിവാഞ്ഛാഫലേ ശ്രീഫലേ

സ്വേദബിന്ദൂല്ലസദ്ഫാലലാവണ്യ നിഷ്യന്ദസന്ദോഹസന്ദേഹകൃന്നാസികാമൗക്തികേ
സർവവിശ്വാത്മികേ സർവസിദ്ധ്യാത്മികേ കാലികേ മുഗ്ദ്ധമന്ദസ്മിതോദാരവക്ത്ര-
സ്ഫുരത് പൂഗതാംബൂലകർപൂരഖണ്ഡോത്കരേ ജ്ഞാനമുദ്രാകരേ സർവസമ്പത്കരേ
പദ്മഭാസ്വത്കരേ ശ്രീകരേ

കുന്ദപുഷ്പദ്യുതിസ്നിഗ്ധദന്താവലീനിർമലാലോലകല്ലോലസമ്മേലന
സ്മേരശോണാധരേ ചാരുവീണാധരേ പക്വബിംബാധരേ

സുലലിത നവയൗവനാരംഭചന്ദ്രോദയോദ്വേലലാവണ്യദുഗ്ധാർണവാവിർഭവത്
കംബുബിംബോകഭൃത്കന്ഥരേ സത്കലാമന്ദിരേ മന്ഥരേ

ദിവ്യരത്നപ്രഭാബന്ധുരച്ഛന്നഹാരാദിഭൂഷാസമുദ്യോതമാനാനവദ്യാംഗ-
ശോഭേ ശുഭേ

രത്നകേയൂരരശ്മിച്ഛടാപല്ലവപ്രോല്ലസദ്ദോല്ലതാരാജിതേ യോഗിഭിഃ
പൂജിതേ വിശ്വദിങ്മണ്ഡലവ്യാപ്തമാണിക്യതേജസ്സ്ഫുരത്കങ്കണാലങ്കൃതേ
വിഭ്രമാലങ്കൃതേ സാധുഭിഃ പൂജിതേ വാസരാരംഭവേലാസമുജ്ജൃംഭ
മാണാരവിന്ദപ്രതിദ്വന്ദ്വിപാണിദ്വയേ സന്തതോദ്യദ്ദയേ അദ്വയേ
ദിവ്യരത്നോർമികാദീധിതിസ്തോമസന്ധ്യായമാനാംഗുലീപല്ലവോദ്യ
ന്നഖേന്ദുപ്രഭാമണ്ഡലേ സന്നുതാഖണ്ഡലേ ചിത്പ്രഭാമണ്ഡലേ പ്രോല്ലസത്കുണ്ഡലേ

താരകാരാജിനീകാശഹാരാവലിസ്മേര ചാരുസ്തനാഭോഗഭാരാനമന്മധ്യ-
വല്ലീവലിച്ഛേദ വീചീസമുദ്യത്സമുല്ലാസസന്ദർശിതാകാരസൗന്ദര്യരത്നാകരേ
വല്ലകീഭൃത്കരേ കിങ്കരശ്രീകരേ

ഹേമകുംഭോപമോത്തുംഗ വക്ഷോജഭാരാവനമ്രേ ത്രിലോകാവനമ്രേ
ലസദ്വൃത്തഗംഭീര നാഭീസരസ്തീരശൈവാലശങ്കാകരശ്യാമരോമാവലീഭൂഷണേ
മഞ്ജുസംഭാഷണേ

ചാരുശിഞ്ചത്കടീസൂത്രനിർഭത്സിതാനംഗലീലധനുശ്ശിഞ്ചിനീഡംബരേ
ദിവ്യരത്നാംബരേ

പദ്മരാഗോല്ലസ ന്മേഖലാമൗക്തികശ്രോണിശോഭാജിതസ്വർണഭൂഭൃത്തലേ
ചന്ദ്രികാശീതലേ വികസിതനവകിംശുകാതാമ്രദിവ്യാംശുകച്ഛന്ന
ചാരൂരുശോഭാപരാഭൂതസിന്ദൂരശോണായമാനേന്ദ്രമാതംഗ
ഹസ്മാർഗ്ഗലേ വൈഭവാനർഗ്ഗലേ ശ്യാമലേ കോമലസ്നിഗ്ദ്ധ
നീലോത്പലോത്പാദിതാനംഗതൂണീരശങ്കാകരോദാര
ജംഘാലതേ ചാരുലീലാഗതേ നമ്രദിക്പാലസീമന്തിനീ
കുന്തലസ്നിഗ്ദ്ധനീലപ്രഭാപുഞ്ചസഞ്ജാതദുർവാങ്കുരാശങ്ക
സാരംഗസംയോഗരിംഖന്നഖേന്ദൂജ്ജ്വലേ പ്രോജ്ജ്വലേ
നിർമലേ പ്രഹ്വ ദേവേശ ലക്ഷ്മീശ ഭൂതേശ തോയേശ വാണീശ കീനാശ
ദൈത്യേശ യക്ഷേശ വായ്വഗ്നികോടീരമാണിക്യ സംഹൃഷ്ടബാലാതപോദ്ദാമ–
ലാക്ഷാരസാരുണ്യതാരുണ്യ ലക്ഷ്മീഗൃഹിതാംഘ്രിപദ്മ്മേ സുപദ്മേ ഉമേ

സുരുചിരനവരത്നപീഠസ്ഥിതേ സുസ്ഥിതേ
രത്നപദ്മാസനേ രത്നസിമ്ഹാസനേ ശംഖപദ്മദ്വയോപാശ്രിതേ വിശ്രുതേ
തത്ര വിഘ്നേശദുർഗാവടുക്ഷേത്രപാലൈര്യുതേ മത്തമാതംഗ
കന്യാസമൂഹാന്വിതേ ഭൈരവൈരഷ്ടഭിർവേഷ്ടിതേ
മഞ്ചുലാമേനകാദ്യംഗനാമാനിതേ ദേവി വാമാദിഭിഃ ശക്തിഭിസ്സേവിതേ
ധാത്രി ലക്ഷ്മ്യാദിശക്ത്യഷ്ടകൈഃ സംയുതേ മാതൃകാമണ്ഡലൈർമണ്ഡിതേ
യക്ഷഗന്ധർവസിദ്ധാംഗനാ മണ്ഡലൈരർചിതേ

ഭൈരവീ സംവൃതേ പഞ്ചബാണാത്മികേ പഞ്ചബാണേന രത്യാ ച
സംഭാവിതേ പ്രീതിഭാജാ വസന്തേന ചാനന്ദിതേ ഭക്തിഭാജം പരം ശ്രേയസേ
കല്പസേ യോഗിനാം മാനസേ ദ്യോതസേ ഛന്ദസാമോജസാ ഭ്രാജസേ ഗീതവിദ്യാ
വിനോദാതി തൃഷ്ണേന കൃഷ്ണേന സമ്പൂജ്യസേ ഭക്തിമച്ചേതസാ വേധസാ
സ്തൂയസേ വിശ്വഹൃദ്യേന വാദ്യേന വിദ്യാധരൈർഗീയസേ

ശ്രവണഹരദക്ഷിണക്വാണയാ വീണയാ കിന്നരൈർഗീയസേ
യക്ഷഗന്ധർവസിദ്ധാംഗനാ മണ്ഡലൈരർച്യസേ

സർവസൗഭാഗ്യവാഞ്ഛാവതീഭിർ വധൂഭിസ്സുരാണാം സമാരാധ്യസേ
സർവവിദ്യാവിശേഷത്മകം ചാടുഗാഥാ സമുച്ചാരണാകണ്ഠമൂലോല്ലസദ്-
വർണരാജിത്രയം കോമലശ്യാമലോദാരപക്ഷദ്വയം തുണ്ഡശോഭാതിദൂരീഭവത്
കിംശുകം തം ശുകം ലാലയന്തീ പരിക്രീഡസേ

പാണിപദ്മദ്വയേനാക്ഷമാലാമപി സ്ഫാടികീം ജ്ഞാനസാരാത്മകം var മാലാഗുണ
പുസ്തകഞ്ചങ്കുശം പാശമാബിഭ്രതീ തേന സഞ്ചിന്ത്യസേ തസ്യ
വക്ത്രാന്തരാത് ഗദ്യപദ്യാത്മികാ ഭാരതീ നിസ്സരേത് യേന വാധ്വംസനാദാ
കൃതിർഭാവ്യസേ തസ്യ വശ്യാ ഭവന്തിസ്തിയഃ പൂരുഷാഃ യേന വാ
ശാതകംബദ്യുതിർഭാവ്യസേ സോഽപി ലക്ഷ്മീസഹസ്രൈഃ പരിക്രീഡതേ

കിന്ന സിദ്ധ്യേദ്വപുഃ ശ്യാമലം കോമലം ചന്ദ്രചൂഡാന്വിതം
താവകം ധ്യായതഃ തസ്യ ലീലാ സരോവാരിധീഃ തസ്യ കേലീവനം
നന്ദനം തസ്യ ഭദ്രാസനം ഭൂതലം തസ്യ ഗീർദേവതാ കിങ്കരി
തസ്യ ചാജ്ഞാകരീ ശ്രീ സ്വയം

സർവതീർഥാത്മികേ സർവ മന്ത്രാത്മികേ
സർവ യന്ത്രാത്മികേ സർവ തന്ത്രാത്മികേ
സർവ ചക്രാത്മികേ സർവ ശക്ത്യാത്മികേ
സർവ പീഠാത്മികേ സർവ വേദാത്മികേ
സർവ വിദ്യാത്മികേ സർവ യോഗാത്മികേ
സർവ വർണാത്മികേ സർവഗീതാത്മികേ
സർവ നാദാത്മികേ സർവ ശബ്ദാത്മികേ
സർവ വിശ്വാത്മികേ സർവ വർഗാത്മികേ
സർവ സർവാത്മികേ സർവഗേ സർവ രൂപേ
ജഗന്മാതൃകേ പാഹി മാം പാഹി മാം പാഹി മാം
ദേവി തുഭ്യം നമോ ദേവി തുഭ്യം നമോ ദേവി തുഭ്യം നമോ
ദേവി തുഭ്യം നമഃ

.. ഇതി ശ്യാമലാ ദണ്ഡകം സമ്പൂർണം ..