HOMENEW7

🚩🔥🔱🚩🔥🔱🚩🔥🔱

*രാമനാമം*

*രാമരാമ രാമരാമ രാമരാമ പാഹിമാം*
*രാമരാമ രാമരാമ രാമരാമ പാഹിമാം*
*രാമപാദത്തോടുചെന്നു ചേരുകെന്റെ മാനസം*
*രാമരാമ രാമരാമ രാമരാമ പാഹിമാം*

*അഞ്ചുഭൂതരഞ്ചുമുള്ളിലൻപത്തൊന്നൊരക്ഷരം*
*അംബികാഗണേശനും വിളങ്ങിനിൽക്കുമാദിയിൽ*
*ആദികാശിതൻപുരേ വസിക്കുമീശ്വരൻപദം*
*പൂജചെയ്തുചൊല്ലിനേൻ മുകുന്ദരാമപാഹിമാം* (രാമരാമ)

*ആത്മമന്ത്രമോടുചേർന്നു രാമനാമമന്ത്രവും*
*ആത്മനാ ലയിച്ചുകൊണ്ട് ഭക്തിയായ് ജപിക്കിലോ*
*ആത്മരാമനായ് ഭവിക്കുമാത്മദോഷമത്രയും*
*വേർപെടുന്നു നിർണ്ണയം മുകുന്ദരാമപാഹിമാം* (രാമരാമ)

*ഇല്ലമോടു ചെല്ലവും കളത്രപുത്രജാലവും*
*വല്ലതും കണക്കുകൾ പറഞ്ഞുകൊണ്ടിരിക്കിലും*
*ഇല്ല ചേതമിന്നു രാമനാമ മന്ത്രമോതുകിൽ*
*നല്ലതേ വരുത്തുവേൻ മുകുന്ദരാമപാഹിമാം* (രാമരാമ)

*ഈശ്വരൻ വസിച്ചിടുന്നതേതൊരമ്പലങ്ങളോ*
*നിശ്ചയിച്ചറിഞ്ഞിടാതുഴന്നിടേണ്ടയാരുമേ*
*ശാശ്വതൻ വസിച്ചിടുന്നദേഹമായൊരമ്പലം*
*വിശ്വസിക്ക സന്തതം മുകുന്ദരാമപാഹിമാം* (രാമ രാമ)

*ഉള്ളതൊന്നുമുള്ളതല്ല ഉള്ളതിന്നു നാശമില്ല*
*കള്ളമല്ല തള്ളലായ് നടന്നിടേണ്ട ആരുമേ*
*ഉള്ളിലുറ്റുണർന്നിരിക്കുമീശ്വരൻ വസിപ്പതേ*
*ഉള്ളിലുറ്റു നോക്കുവിൻ മുകുന്ദരാമപാഹിമാം* (രാമരാമ)

*ഊടെ രണ്ടു മന്ത്രമുണ്ടു ഓടിനിൽക്കുമങ്ങതിൽ*
*ഗൂഢമായ് വസിപ്പു സത്യസന്ധനായൊരീശ്വരൻ*
*തേടിനാടിയുടെ ചെന്നു കണ്ടുകൊൾക ഭക്തരെ*
*കൂടുമീശ്വരൻപദം മുകുന്ദരാമ പാഹിമാം* (രാമരാമ)

*എന്തിനായ് ഭ്രമങ്ങൾകൊണ്ടു മായാമോഹവാരിധൗ*
*അന്ധരായി വീണുഴന്നു കേണിടേണ്ടിന്നാരുമേ*
*ഹന്തരാമദേവപാദ ചിന്തനങ്ങൾ ചെയ്കിലോ*
*അന്ത്യകാലമന്തകഭയത്തിൽനിന്നും വേർപെടും* (രാമരാമ)

*ഏഴുവാതിൽ മുകളിലുണ്ടു കീഴിൽ രണ്ടു നില്പതും*
*വാഴുമങ്ങതിൽ ജനങ്ങൾ മണ്ഡലങ്ങൾ രണ്ടിലും*
*ഉത്തമഗുരുവതിലിരിപ്പതുണ്ടു ലോകരെ*
*ശ്രദ്ധയോടു നോക്കുവിൻ മുകുന്ദരാമപാഹിമാം* (രാമരാമ)

*ഐയ്യമോടു ഭൂമിയിൽ വസിപ്പതെന്തു ചേതവും*
*മെയ്യകത്തുതന്നെയാണിന്നീശ്വരൻ വസിപ്പതും*
*പൊയ്യകറ്റിമാനസം ഭജിക്കുമാകിലോദൃഢം*
*പയ്യവേസമീപമായിന്നീശനോടു ചേർന്നിടാം* (രാമരാമ)

*ഒത്തതല്ല ജാതിയെന്നു ഭോഷരായവർകളും*
*ചൊൽകിലും ഭ്രമിക്കയില്ല ബോധമുള്ളിലുള്ളവർ*
*പത്തുദിക്കിലും നിറഞ്ഞ തമ്പുരാൻ പദാംബുജം*
*ചിത്തേവാഴ്ക സന്തതം മുകുന്ദരാമപാഹിമാം* (രാമരാമ)

*ഓടിയോടിയെങ്ങുമേ നടന്നിടേണ്ടയാരുമേ*
*ഗൂഢമായ് വസിപ്പു ദേഹമായൊരുത്തമാലയെ*
*ഉത്തമാംഗമാം ശിരസ്സിൽ നാസികാഗ്രമാം സ്ഥലേ*
*ഉറ്റുനോക്കി സേവചെയ്തു തുഷ്ടരായ് വസിക്കുവിൻ* (രാമരാമ)

*ഔവ്വനങ്ങളാകുമീ പ്രപഞ്ചവും നശിച്ചുപോം*
*ദൈവമെന്നതോർത്തുകൊൾക മാനുഷാദിയേ ദൃഢം*
*ഔവ്വഴി ഭവാനൊഴിഞ്ഞു കണ്ടതില്ലിന്നാരുമേ*
*നേർവഴി വരുത്തണേ മുകുന്ദരാമപാഹിമാം* (രാമരാമ)

*അംബയോടുതുല്യമായ അംബുജാക്ഷിമാർകളെ*
*ആരുമേഗ്രഹിച്ചിടാതെ മാനസം ഭ്രമിക്കൊലാ*
*മാനഡംഭു ദൂരെനീക്കി മാനസാൽ ഭജിക്കിലൊ*
*മുക്തിവന്നിതപ്പൊഴേ മുകുന്ദ രാമ പാഹിമാം*(രാമരാമ )

*അല്പകാലമിന്നു കല്പകാലമെന്നതോർത്തു നാം*
*ചിത്പുരുഷമായയിൽ ഭ്രമിക്കവേണ്ടൊരല്പവും*
*കല്പവൃക്ഷതുല്യരാമദേവനെ ഭജിക്കുവാൻ*
*മുക്തിവന്നിതപ്പൊഴേ മുകുന്ദരാമപാഹിമാം*
(രാമരാമ)

🚩🔥🔱🚩🔥🔱🚩🔥🔱